”სოლიდარობის მარშის ჩატარება, ჩემი აზრით, ძალიან მნიშვნელოვანი სწორედ ჩვენი ტიპის ქვეყნებშია, სადაც უფლებებისთვის ბრძოლაა საჭირო. ეს იმ ბრძოლის ნაწილია, რომელიც მოიცავს განათლებას საბავშვო ბაღებში, სკოლებში, უნივერსიტეტებში, შრომის უფლებას, თვითგამოხატვის თავისუფლებას და ა.შ. ზოგადად – ადამიანის უფლებები ჩვენს ქვეყანაში ბრძოლით დასაცავია. და როდის, თუ არა დღეს?! ან ვინ, ჩვენ თუ არა?!
პრაიდი თემის წევრებისთვის ერთიანობის სიმბოლოა. ზოგადად, რაღაც დიდის და ერთიანის წევრად უფრო მშვიდად და დაცულად გრძნობს თავს ადამიანი. მარშზე ოჯახის, მეგობრებისა და უბრალოდ სოლიდარული ადამიანების ყოფნა, კიდევ უფრო აძლიერებს ამ სიმშვიდის და დაცულობის შეგრძნებას – ადამიანი უფრო თავდაჯერებული და ბედნიერია იმით, რომ მას იღებენ ისეთს, როგორიცაა, იღებენ ის ადამიანები, ვინც მისთვის ძალიან მნიშვნელოვანია, ვინც უყვარს.
სოლიდარობა ყველა თემისთვის მნიშვნელოვანია, მით უმეტეს, როდესაც ყველა ვთანხმდებით, რომ უფლებები მოსაპოვებელი და დასაცავია. ეს არ გამორიცხავს განსხვავებული აზრის ქონას, მაგრამ შეიძლება მსჯელობა, კამათი, ცივილურად და, თუ საჭიროა, რაციონალური კომპრომისებით. მაგრამ ეს უნდა გავაკეთოთ ჩვენ და ეს უნდა გავაკეთოთ დღეს. უნდა მოვთხოვოთ პოლიტიკოსებსაც და საზოგადოებასაც, აღიაროს და დაიცვას უფლებები და ნაბიჯ-ნაბიჯ მივალთ იქამდე, სადაც დღეს ცივილური სამყაროა.”
