ევროპაში ლგბტქი უფლებების დამცველი უდიდესი ორგანიზაციის, ILGA Europe -ის 2021 წლის რუკის მიხედვით, ლგბტქი ადამიანების უფლებების დაცულობის მხრივ, პირველ ადგილს მალტა ინარჩუნებს, მეორე ადგილზე ბელგიაა, ხოლო ბოლო ადგილებს ისევ რუსეთი, სომხეთი და თურქეთი იკავებენ. ყველაზე ბოლო, 49-ე ადგილზეა აზერბაიჯანი.
საქართველო ამ სიაში 32-ე ადგილზეა. შარშანდელთან შედარებით, მისი რეიტინგი კიდევ ორი პუნქტით დაიწია შემდეგი საფუძვლით – სახელმწიფომ ტრანსგენდერი ადამიანებისთვის კვლავ არ მოაწესრიგა პირადობის დამადასტურებელ დოკუმენტებში სქესის ჩანაწერის შეცვლის პროცედურა, ასევე, ლგბტქი აქტივისტებზე განხორციელებული თავდასხმების გამო.
Rainbow Europe არის ILGA Europe -ის ყოველწლიური კვლევის ინსტრუმენტი, რომელიც მოიცავს რუკას, ინდექსსა და რეკომენდაციებს. 2009 წლიდან ორგანიზაცია რუკას ევროპის მასშტაბით ლგბტქი უფლებებთან დაკავშირებული პოლიტიკური და საკანონმდებლო სიტუაციის საილუსტრაციოდ იყენებს.
ევროპის 49 ქვეყანაში ლგბტქი უფლებებთან დაკავშირებული პოლიტიკური და საკანონმდებლო სიტუაციის მიხედვით, ამ ქვეყნების რანჟირება ხდება 0-დან 100%-მდე. რეიტინგის განსაზღვრისთვის 71 სხვადასხვა კრიტერიუმი გამოიყენება, რომელიც 6 თემატურ კატეგორიადაა დაყოფილი:
- თანასწორობა და არადისკრიმინაცია
- ოჯახი
- სიძულვილით მოტივირებული დანაშაულებები და სიძულვილის ენა
- გენდერის საკანონმდებლო აღიარება და ფიზიკური ხელშეუხებლობა
- საზოგადოებრივი სივრცე
- თავშესაფარი
