გასულ კვირას ჟურნალ People– ში გამოაქვეყნდა 2021 წლის „ყველაზე სექსუალური მამაკაცების“ სიები, სადაც ჰოლივუდის სხვა ცნობილ ვარსკვლავებთან ერთად, ტრანსგენდერ მსახიობ მამაკაცს, ბრაიან მაიქელ სმიტსაც შევხვდებით.
ბრაიან მაიქელ სმიტი მოხვდა სიაში „ყველაზე სექსუალური მამაკაცები სატელევიზიო ეკრანებზე“. ის პირველი ტრანსგენდერი მამაკაცია, რომელიც გავლენიანი ჟურნალის სიაში მოხვდა.
38 წლის მსახიობი მაყურებელმა აქამდე ლენა დანჰემის „გოგოებში“ და პოლიტიკურ დრამა Homeland-ში იხილა, ყველაზე სექსუალური მამაკაცის ტიტული კი რაიან მერფის სერიალ „9-1-1 – მარტოხელა ვარსკლავში“ შესრულებული როლისთვის დაიმსახურა.
„ძალიან ბევრი რამ დაუძახებიათ ჩემთვის, მაგრამ ეს პირველია. ძალიან ამაყი ვარ, რომ ამ სიაში მოვხვდი“ – წერს მსახიობი თავის თვითერზე. ის ასევე პირველი ტრანსგენდერი მამაკაცია, რომელიც საკაბელო არხზე გასულ სერიალში მთავარ როლში გვევლინება.
ინტერნეტ-გამოცემა People-ის ,,ყველაზე სექსუალური მამაკაცის” გამოკითხვა რამდენიმე კვირის განმავლობაში მიმდინარეობდა ჟურნალის ვებ-გვერდზე და მასში მონაწილეობა ნებისმიერ მკითხველს შეეძლო.
