შოტლანდიის მთავრობამ მასწავლებლებისთვის ახალი სახელმძღვანელო გამოსცა, რომელშიც გაწერილია, თუ როგორ უნდა შეუქმნან უსაფრთხო და კარგი სასწავლო გარემო ტრანსგენდერ მოსწავლეებს. კომფორტული გარემოს შექმნა გულისხმობს ტუალეტის გამოყენების შესაძლებლობასაც ბიოლოგიური სქესის მიუხედავად. სკოლებში სასწავლო პროცესი წარიმართება მოსწავლის საუკეთესო ინტერესებიდან გამომდინარე.
იმისთვის, რომ არაბინარული და ტრანსგენდერი ადამიანებისთვის სასწავლო პროცესი უსაფრთხო იყოს, რეგულაციები ჩაცმის საკითხებსაც შეეხება. არ შეიძლება მოსწავლის იძულება, ჩაიცვას მისი ბიოლოგიური სქესისთვის დამახასიათებელი ტანსაცმელი. გაიდლაინში ასევე ასახულია რჩევები მასწავლებლებისთვის, როგორ აღკვეთონ ბულინგი ტრანსგენდერი ადამიანების მიმართ.
„თითოეული ბავშვისა და ახალგაზრდის ჯანმრთელობა და კეთილდღეობა უნდა იყოს ჩვენი მთავარი საზრუნავი. დარწმუნებული ვარ, რომ აღნიშნული სახელმძღვანელო დაეხმარება სკოლებს, შექმნან ისეთი საწავლო გარემო, სადაც უსაფრთხოება, ღირსება და პატივისცემა უზრუნველყოფილია ყველა მოსწავლისთვის, რათა მათ საკუთარი პოტენციალის სრულყოფილად რეალიზება შეძლონ.“ – ნათქვამია ოფიციალურ განცხადებაში.
წყარო: them.us
