“გეი სისხლი” — სისხლის დონაციაზე არსებული შეზღუდვების გასაპროტესტებლად

Published on სექტემბერი 14, 2022

მულტიდისციპლინურმა კრეატიულმა ინსტიტუციამ, Mother Goods-მა “გეი სისხლის” გამოყენებით დამზადებული საღებავების გაყიდვა დაიწყო, რათა აშშ-ში დღემდე არსებულ არქაულს კანონს შეეწინააღმდეგონ, რომელიც სხვა კაცებთან სქესობრივ კავშირში მყოფ კაცებს სისხლის დონაციაზე შეზღუდვებს უწესებს.

კრეატიული ციფრული მაღაზია “მსოფლიოს გაუმჯობესებას” ცდილობს, მათივე სიტყვებით, “ზოგჯერ უბრალოდ სულელური, მარგინალური გზებით”, ამიტომ ხელოვან სტიუარტ სემპლთან გაერთიანდნენ და ორგანიზაციის გეი თანამშრომლების სისხლის გამოყენებით შექმნილი მელნისა და საღებავების გაყიდვა დაიწყეს. აღნიშნული წამოწყებიდან შემოსული თანხა სრულად გადაირიცხება ნიუ იორკში არსებული ლგბტქი ჯანმრთელობის დაცვის ორგანიზაციაში.

მათი თქმით, სისხლი არის საშუალება, რომ გააპროტესტონ შეზღუდვები. ორგანიზაციის სურვილია, ნახატებში, გრაფიტებში თუ სხვადასხვა ადმინისტრაციისთვის გაგზავნილ წერილებში “გეი სისხლის” გამოყენებით, ხელი შეუწყონ სისხლის დონაციაზე დაწესებული აკრძალვების გაუქმებას.

აშშ-ის საკვებისა და მედიკამენტების ადმინისტრაციის 1983 წელს შემუშავებული გზამკვლევით, იმ კაცებს, რომლებსაც კაცებთან ჰქონდათ სექსი, სისხლის დონაცია შეეზღუდათ. 80-იანი წლების აივ-შიდსის ეპიდემიის შოკისგან გამოწვეული აკრძალვების საჭიროება დღეს უკვე აღარ არის, ამიტომ მსოფლიოს მრავალი ქვეყანა სისხლის გაცემაზე სექსუალური ორიენტაციის ნიშნით დაწესებულ შეზღუდვებს აუქმებს. თუმცა, აშშ-ში აღნიშნულ პროგრესს დღემდე ვერ მიაღწიეს — იმ კაცებს, რომელთაც სქესობრივი კავშირი სხვა კაცებთან აქვთ, სისხლის გაცემა ბოლო სექსიდან 3 თვის გასვლის შემთხვევაში შეუძლიათ.

მსოფლიოში 50 მილიონი ადამიანი თანამედროვე მონობაში ცხოვრობს – ანგარიში

Published on სექტემბერი 13, 2022

ქვიარ სიახლეები

Global Estimates of Modern Slavery-ის 2021 წლის მონაცემების მიხედვით, მსოფლიოში 50 მილიონი ადამიანი თანამედროვე მონობაში ცხოვრობს, მათ შორის, 28 მილიონს იძულებითი სამუშაოში ჩართვა, ხოლო 22 მილიონს იძულებით ქორწინებაში ცხოვრება უწევს.

თანამედროვე მონობა ორი მნიშვნელოვანი კომპონენტით — იძულებითი სამუშაოს ან იძულებითი ქორწინების მდგომარეობით დგინდება და გულისხმობს ექსპლუატაციის სიტუაციას, რომელზეც უარის თქმა ადამიანს მუქარის, ძალადობის, ჩაგვრის, მოტყუების, ძალაუფლების ბოროტად გამოყენების გამო არ შეუძლია.

თანამედროვე მონობა მსოფლიოს თითქმის ყველა ქვეყანაში, ეთნიკური, კულტურული თუ რელიგიური ფაქტორების მიუხედავად გვხვდება. აღსანიშნავია, რომ იძულებითი შრომის 52% საშუალოზე მაღალი ან მაღალი შემოსავლის ქვეყნებში ფიქსირდება.

იძულებითი მუშაობის 86% კერძო სექტორზე მოდის, მათ შორის, 23% სექსუალური ექსპლუატაციის შემთხვევებია. სექსუალური ექსპლუატაციის მსხვერპლი ყოველი 5 ადამიანიდან 4 ქალი ან გოგოა. იძულებით სამუშაოში ჩართული ყოველი 8 ადამიანიდან ერთი ბავშვია (სულ 3,3 მილიონი), რომელთა ნახევარი სექსუალური ექსპლუატაციის მსხვერპლია.

იძულებით ქორწინებაში 22 მილიონი ადამიანი იმყოფება, რაც 2016 წლის მონაცემებს 6,6 მილიონით აღემატება. იძულებით ქორწინებაში მცხოვრები ადამიანების, განსაკუთრებით 16 წლამდე ასაკის ბავშვების რეალური ოდენობა სავარაუდოდ გაცილებით მეტია, ვიდრე ანგარიშშია მოცემული. ამის მიზეზი არის ის, რომ ანგარიში იძულებითი ქორწინების ვიწრო გაგებას ეყრდნობა, არადა ნებისმიერი ბავშვი იძულებით ქორწინებაშია, რადგან გაცნობიერებული გადაწყვეტილების სამართლებრივად მიღება არ შეუძლია.

იძულებითი ქორწინების 85%-ზე მეტი ოჯახის ზეწოლით არის გამოწვეული და შემთხვევების ⅔ აზია-წყნაროკეანეთის რეგიონში ფიქსირდება. არაბეთის საემიროებში კი ყოველი ათასი ადამიანიდან დაახლოებით 5 იძულებით ქორწინებაშია.

ტრანსფობია გერმანიაში — ანტი-ქვიარ თავდასხმების გაზრდილი მაჩვენებელი

Published on სექტემბერი 13, 2022

ქვიარ სიახლეები

გერმანიის ქალაქებში – მიუნსტერში, აუგსბურგსა და ბრემენში, სამი თვის განმავლობაში ქვიარ ადამიანებზე სამი სასტიკი თავდასხმა მოხდა. ერთ-ერთი ასეთი შემთხვევის შედეგად ტრანსგენდერი კაცი, მალტე გარდაიცვალა. მან ლესბოსელი ქალების დაცვა სცადა, რომლებსაც ავიწროებდნენ და შეურაცხყოფდნენ. თავდამსხმელმა მალტეს დაარტყა, კაცი ასფალტზე დაეცა და თავის ტვინის მძიმე დაზიანება მიიღო. მიღებული ტრავმისგან ის, 6 დღის შემდეგ, კომაში მყოფი გარდაიცვალა.

ამ ფაქტმა გერმანიის მაცხოვრებლების შეშფოთება გამოიწვია. ქვეყნის მმართველი სოციალ-დემოკრატიული პარტიის ერთ-ერთმა ლიდერმა, სასკია ესკენმა ტვიტერზე დაწერა:

“ეს ინციდენტი არის სასტიკი შეხსენება იმისა, რომ სიძულვილით მოტივირებული დანაშაულები ქვიარ ადამიანების წინააღმდეგ გრძელდება. ყოველ კვირა, ყოველ დღე”.

სტატისტიკურად, გერმანიაში დღეში 2 ანტი-ქვიარ თავდასხმა ფიქსირდება, თუმცა ქვეყნის შინაგან საქმეთა სამინისტრო აღიარებს, რომ რეალური რიცხვი ბევრად მეტია. ორგანიზაცია ლესბოსელებისა და გეების ასოციაცია (LSVD), ასევე, პოლიცია, მიიჩნევს, რომ შემთხვევების 90% არ არის აღრიცხული. ბევრი თავდასხმა კრისტოფერ ქუჩის დღის მარშებს ემთხვევა. კრისტოფერ ქუჩის დღე ლგბტქი პრაიდების სახელწოდებაა, რომელიც რამდენიმე გერმანულენოვან ქვეყანაში ტარდება.

“ხილვადობა ყოველთვის დაკავშირებულია საფრთხესთან. სამწუხაროდ, ქვიარ ადამიანების ყოველი საჯარო შეკრება მათ რისკის ქვეშ აყენებს. ჩვენ გულწრფელები უნდა ვიყოთ ამასთან დაკავშირებით. თუმცა, პრობლემა მხოლოდ კრისტოფერ ქუჩის დღის მოვლენები არ არის. თავდასხმები ხდება ყოველდღე, დღის ყოველ მონაკვეთში, ყველაზე გადატვირთული ქუჩებიდან ყველაზე ვიწრო ჩიხებამდე. ხდება მეტროში, ავტობუსში, სკოლის ეზოში, კომპანიებში, კლუბებსა და სავაჭრო ცენტრებში. სასტიკად ჟღერს, მაგრამ სამწუხაროდ, არასდროს ვართ ჭეშმარიტად უსაფრთხოდ“, — განაცხადა DW-სთან ინტერვიუში ლესბოსელებისა და გეების ასოციაციის ფედერალური საბჭოს წევრმა, ალფონსო პანტისანომ.

არასრული მონაცემები

DW-ის ცნობით, გერმანიის კრიმინალური პოლიციის ფედერალური ოფისი ანტი-ქვიარ დანაშაულებს “გენდერული/სექსუალური იდენტობის” კატეგორიაში მხოლოდ 2020 წლიდან აღრიცხავს. ამ და სექსუალური ორიენტაციის ნიშნით ჩადენილი დანაშაულების სტატისტიკა მნიშვნელოვნად გაზრდილია — 66% და 50%-ით. თავდასხმები, რომლებშიც მთავარი ფაქტორი ტრანსგენდერი ადამიანების მტრობაა, ცალკე არ აღირიცხება.

ბერლინში პოლიცია შემთხვევების საშუალოზე მაღალ რაოდენობას აფიქსირებს და ქვიარ დანაშაულებზე კარგად მუშაობს, მაგრამ ეს იმას არ ნიშნავს, რომ გერმანიის სხვა ქალაქებში მსგავსი დანაშაულები არ ხდება.

“თუ მიუნხენის, შტუტგარტის ან ფრანკფურტის პოლიციაში მივალ და ვიტყვი, რომ სექსუალური ორიენტაციის გამო თავს დამესხნენ, ეს შეიძლება ჩაიწეროს ისე, როგორც ფიზიკური შეურაცხყოფა. აქედან გამომდინარე, ქვიარ თავდასხმა სტატისტიკიდან ქრება. ბერლინში სხვაგვარადაა. დედაქალაქში პოლიციას ამ საკითხთან დაკავშირებით ბევრი ტრენინგი აქვს გავლილი“, — აცხადებს ალფონსო პანტისანო.

პოლიტიკურად მოტივირებული ძალადობა

ტრანსგენდერი კაცის, მალტეს გარდაცვალებამ ჰომოფობიური დანაშაულების ჩამდენ პირებთან დაკავშირებით დებატები გამოიწვია. ზოგიერთი გახმაურებული თავდასხმა ახალგაზრდა კაცების, ზოგიერთი მუსლიმისა და გერმანიაში მიგრირებული ადამიანის მიერაა ჩადენილი. ფსიქოლოგმა და მწერალმა, აჰმად მანსუნმა, რომელიც ყურადღებას ისლამზე ამახვილებს, გერმანულ მედია Bild-ს მიუნსტერში სავარაუდო ჩეჩენ დამნაშავეზე მიუთითა:

“ჰომოსექსუალების სიძულვილი ჩეჩენ, ავღანელ და სირიელ კაცებში გავრცელებულია. ამ ქვეყნებიდან მიგრაციის ზრდასთან ერთად, გერმანიაში ჰომოფობიაც იზრდება”, — განაცხადა მან.

გერმანიის კრიმინალური პოლიციის ფედერალური ოფისის მწირი მონაცემები აჩვენებს, რომ ტრანსგენდერ ადამიანებს უცხო და რელიგიური იდეოლოგიები უქმნიან საფრთხეს, მაგრამ უპირველეს ყოვლისა, საფრთხე ულტრამემარჯვენე სოციალური გარემოდან მოდის. “გენდერული/სექსუალური იდენტობის” და “სექსუალური ორიენტაციის” კატეგორიის დანაშაულების უმეტესობა მემარჯვენე დამნაშავეების ჩადენილია. თუმცა, არ შეიძლება მათ მიეწეროთ ყველა დანაშაული, რაც მიგვითითებს იმაზე, რომ ჰომოფობიური თავდასხმები პრობლემას წარმოადგენს მთლიანი საზოგადოებისთვის.

პოლიტიკოსების რეაქცია

ტრანსგენდერი კაცის სიკვდილმა ქალაქ მიუნსტერში პოლიტიკოსების შეშფოთება გამოიწვია. გერმანიის ფედერალური მთავრობის კომისარმა სექსუალური და გენდერული მრავალფეროვნების მიღების საკითხებში, სვენ ლემანმა, სხვადასხვა ასოციაციაში ტრანსფობიისა და ჰომოფობიის წინააღმდეგ სამოქმედო გეგმა გაგზავნა. ასეთ პროექტს დიდი ხნის განმავლობაში ითხოვდნენ.

სხვა ქვეყნებთან შედარებით, ლგბტქი უფლებების საკითხებში გერმანია ბევრად უკან არის. მაგალითად, აქ ტრანსგენდერ და ჰომოსექსუალი ადამიანებს ჯერ კიდევ არ შეუძლიათ გახდნენ სისხლის დონორები.

2021 წელს, 16 ფედერაციული მხარის შინაგან საქმეთა მინისტრების კონფერენციაზე ჰომოფობიურ და ტრანსფობიურ ძალადობასთან საბრძოლველად სამუშაო ჯგუფის შექმნა გადაწყდა, თუმცა ამ თემაზე შეხვედრა პირველად 2022 წლის სექტემბერში გაიმართა.

“ეს ნიშნავს, რომ პოლიტიკოსებს ამ საკითხთან დაკავშირებით მთელი წელი არაფერი გაუკეთებიათ. ჩვენ ვცხოვრობთ ქვეყანაში, რომელსაც აქვს პრეტენზია, რომ მხარს უჭერს მრავალფეროვნებას. ჩემი აზრით, გერმანიას მრავალფეროვნების პრობლემა აქვს. ჩვენ ამაზე უნდა ვისაუბროთ”, — აღნიშნა ლესბოსელებისა და გეების ასოციაციის ფედერალური საბჭოს წევრმა, ალფონსო პანტისანომ.

სერბეთის პოლიციამ ევროპრაიდის მარში აკრძალა — ორგანიზატორები გაასაჩივრებენ

Published on სექტემბერი 13, 2022

ქვიარ სიახლეები

17 სექტემბერს დაგეგმილი ევროპრაიდის მარში პოლიციამ ულტრამემარჯვენე ჯგუფების მიერ დაგეგმილი პროტესტის გამო აკრძალა, რის საპასუხოდაც ბელგრად პრაიდი საჩივრის დაწერას და გადაწყვეტილების შეცვლის მოთხოვნას აპირებს. აღნიშნული აკრძალვა ევროპრაიდის საწინააღმდეგო 3-კვირიანი გამოსვლების შედეგია, რომელიც სერბეთის პრეზიდენტის, ალექსანდარ ვუჩიჩის განცხადებით დაიწყო. ალექსანდარ ვუჩიჩმა ღონისძიების გაუქმება დააანონსა.

“პოლიციამ ბოლო შესაძლო მომენტამდე იცადა, რათა ევროპრაიდის მარში აეკრძალა. ბელგრადში მუდამ ასე ვითარდებოდა სიტუაცია და სასამართლო გადაწყვეტილებას არაკონსტიტუციურად მიიჩნევდა. ეს ევროპრაიდის აკრძალვის პირველი მცდელობაა და დაუშვებელია. ეჭვი არ მეპარება, რომ სასამართლო ამ ჯერზეც სწორ გადაწყვეტილებას მიიღებს”, — აღნიშნა კრისტინ გარინამ, ევროპული პრაიდის ორგანიზატორთა ასოციაციის პრეზიდენტმა.

გარინას თქმით, სერბეთის პრემიერმინისტრ ანა ბრნაბიჩს, რომელიც ევროპრაიდის ადამიანის უფლებათა კონფერენციაზე სიტყვით უნდა გამოვიდეს, მოუწევს ახსნა, რატომ არ დაიცვა მხარდაჭერის პირობა, რომელიც 2019 წელს, ევროპრაიდის სამომავლო პარტნიორის შერჩევის პროცესისას დადო.

“ეს აკრძალვა პოლიტიკური ნების სრულ არარსებობას ცხადყოფს და სერბეთის უუნარობას, რომ საკუთარი მოქალაქეების ფუნდამენტური თავისუფლებები დაიცვას. თავმოყვარე ქვეყანა ბულერებს არ დანებდებოდა”, — აღნიშნა ევროპული EPOA-ს პრეზიდენტმა და დაამატა, რომ შაბათს მარშის უფლების ვერმოპოვების შემთხვევაშიც შეიკრიბებიან.

მან ყველა მხარდამჭერს იმავესკენ მოუწოდა:

“ცვლილების დროა. ბელგრადის დროა. აქ ვართ და შევიკრიბებით”.

ევროპრაიდი 2022 ბელგრადში 12 სექტემბერს ლგბტქი დროშის აღმართვის ცერემონიით დაიწყო და 18 სექტემბერამდე გასტანს. კვირეულის ფარგლებში 100-ზე მეტი ღონისძიებაა დაგეგმილი.

მსახიობი სამირა უილი და მისი შემთხვევითი ქამინგაუთი

Published on სექტემბერი 13, 2022

ქვიარ გართობა

მსახიობი სამირა უილი, რომელიც ქართველი მაყურებლისთვის კარგად არის ცნობილი სერიალებიდან Orange is the New Black და The Handmaid’s Tail, იმ ინციდენტზე ყვება, როდესაც შემთხვევით დააქამინგაუთეს.

“ერთ-ერთი ინტერვიუს დროს, ადამიანებმა, რომლებთან ერთადაც ვმუშაობდი, საჯაროდ დაქამინგაუთებული მსახიობების შესახებ ისაუბრეს და ჩემი სახელი ახსენეს”, — აღნიშნა სამირამ.

მსახიობმა ამ ფაქტზე ადრეც ისაუბრა და იმედგაცრუება გამოხატა, რადგან ვერ მოახერხა ისე წარმოეჩინა საკუთარი თავი, როგორც თავად სურდა.

“წავიკითხე თუ არა მათი ინტერვიუ, უბრალოდ ცრემლები წამომივიდა. ჩემმა სარეკლამო აგენტმა ინტერვიუ ინტერნეტიდან 30 წუთში ამოიღო, მაგრამ რა არის 30 წუთი ინტერნეტში? მთელი სიცოცხლე”, — თქვა მან და აღნიშნა, თუ რამდენად შემაშფოთებელი იყო ეს სიტუაცია.

The Guardian-თან საუბრისას უილიმ აღიარა, რომ თავდაპირველად ყოყმანობდა მისი ამჟამინდელი როლის შესრულებაზე „მხევლის წიგნში“ რადგან მისი პერსონაჟი, როგორც Orange is the New Black-ის ფუსეი, ქვიარია.

უილიმ აღიარა, რომ გენდერულმა თვითგამოხატვამ და ინსტაგრამზე აქტიურობამ ადამიანებს მის სექსუალობაზე ვარაუდების გაკეთებაში ხელი შეუწყო. მსახიობის თქმით, ისინი არ ცდებოდნენ, მაგრამ სურდა, საჯარო ქამინგაუთი თავად გაეკეთებინა.

“ისეთი შეგრძნება მქონდა, თითქოს რაღაც წამართვეს”, — თქვა მან.

მიუხედავად იმისა, რომ შემთხვევითი ქამინგაუთით იმედგაცრუებული იყო, უილიმ საბოლოოდ მეტი გეი პერსონაჟის როლის შესრულება გადაწყვიტა, მათ შორის, The Handmaid’s Tail-ში და როგორც თავად ამბობს, ახლა უფრო მეტად გრძნობს ამ გადაწყვეტილების სისწორეს.

“ახლანდელი გადმოსახედიდან, გულუბრყვილოა იმის თქმა, რომ გეი პერსონაჟების როლის მორგება არ მინდა. ჰეტერონორმატიულია იდეა, თითქოს ქვიარები ერთმანეთისგან არ განვსხვავდებით. მოირა (მხევლის წიგნის პერსონაჟი) სრულიად განსხვავებული და საკუთარ თავში გაცნობიერებული ადამიანია ფუსეისთვის. ტელევიზიით შავკანიანი გეი ქალის წარმოჩენა ჩემთვის სიძლიერესთან ასოცირდება. ბავშვობაში ამის ნახვას ვერასდროს შევძლებდი”, — განმარტავს მსახიობი.

შეგახსენებთ, რომ The Handmaid’s Tail-ის მეხუთე სეზონის პრემიერა Hulu-ზე ოთხშაბათს, 14 სექტემბერს გაიმართება.

აღმოსავლეთ ევროპა და ცენტრალური აზია აივ-ინფიცირების ყველაზე სწრაფად მზარდი რეგიონებია

Published on სექტემბერი 13, 2022

ქვიარ ზრუნვა

გაეროს შიდსთან ბრძოლის ინიციატივამ (UNAIDS) აივ-შიდსის ეპიდემიის განახლებული მონაცემები გამოაქვეყნა, რომლის თანახმადაც აღმოსავლეთ ევროპისა და ცენტრალური აზიის რეგიონი აივ-ინფიცირების ყველაზე სწრაფად მზარდი რეგიონია. 2021 წელს, რეგიონში აივ-ინფიცირების 160 ათასი შემთხვევა დაფიქსირდა, რაც 2010 წლის მონაცემებს 48%-ით აღემატება. შიდსთან დაკავშირებული გართულებებით გამოწვეული სიკვდილიანობა კი 32%-ით მაღალია.

ამასთან, აღნიშნულ რეგიონებში აივ პრევენციისა და მკურნალობის სერვისებით უზრუნველყოფაც არასაკმარისია. 2021 წლის მონაცემებით, აივ-ინფიცირებულთა მხოლოდ 63%-მა იცის საკუთარი სტატუსის შესახებ და მათი 81% (სულ ინფიცირებულთა 51%) მედიკამენტურ მკურნალობაშია ჩართული. აღსანიშნავია, რომ საფრთხისშემცველი ინექციური მკურნალობის პრაქტიკები რეგიონში კვლავ გავრცელებულია, მედიკამენტური მკურნალობა კი ხელმისაწვდომი არ არის უზბეკეთსა და თურქმენეთში.

UNAIDS-ის ახალი ანგარიშის თანახმად, “სტიგმა და დისკრიმინაცია აივ-შიდსის საპასუხო რეაგირების ეფექტურობას აფერხებს. მაგალითისთვის, გამოკითხული ტაჯიკი აივ-დადებითი ადამიანების მხოლოდ 23% აფასებს სტატუსის გაცხადების შემდეგ მიღებულ გამოცდილებას პოზიტიურად”.

დოკუმენტში ვკითხულობთ, რომ სამართლებრივი მდგომარეობა და კანონები ქვეყნების მიხედვით განსხვავდება. სხვა ადამიანების აივ-ინფიცირება ან საკუთარი სტატუსის არგამჟღავნება კრიმინალიზებულია ყველა ქვეყანაში, ბოსნია და ჰერცოგოვინასა და ჩრ. მაკედონიის გარდა. სექს-სამუშაო და ნარკოტიკების მოხმარება ზოგიერთ ქვეყანაშია დეკრიმინალიზებული. გასულ 12 წელში ქვეყნების ნაწილმა: სომხეთმა, ყაზახეთმა, ყირგიზეთმა, მოლდოვამ და ტაჯიკეთმა ერთი და იმავე სქესის ადამიანებს შორის სქესობირივი კავშირების დეკრიმინალიზებას მიაღწიეს, მაგრამ ზოგიერთ ქვეყანაში გეი სექსთან დაკავშირებული სტიგმა და პოლიციის ძალმომრეობა კვლავ გავრცელებულია.

ანგარიში არსებული დინამიკის შენარჩუნების შემთხვევაში 2025 წლისთვის საჭირო ფინანსური რესურსების შესახებ ინფორმაციასაც მოიცავს. 2025 წლისთვის საჭირო ფინანსები $3 500 მილიონია, რაც დღეისთვის აუცილებელ თანხას ორჯერ აღემატება.

აღსანიშნავია, რომ აივ-ინფიცირებისა და შიდსის თანმდევი გართულებებით გარდაცვალების დინამიკა აღმოსავლეთ ევროპისა და ცენტრალური აზიის გარდა ყველა სხვა რეგიონში იკლებს, ხოლო ახლო აღმოსავლეთისა და ჩრდილოეთ აფრიკის რეგიონში აივ-ინფიცირების დინამიკა 2010 წლიდან 2021 წლის ჩათვლით 33%-ით გაიზარდა, თუმცა სიკვდილიანობის მაჩვენებელი 22%-ით შემცირდა.

მსახიობი სიუზან სარანდონი ბისექსუალად დაქამინგაუთდა

Published on სექტემბერი 12, 2022

ქვიარ სიახლეები

ცნობილმა ამერიკელმა მსახიობმა და აქტივისტმა, სიუზან სარანდონმა, ახალ ინტერვიუში თავისი ბისექსუალობა დაადასტურა.

The Tonight Show-ში, ჯიმი ფელონთან მისი ბოლო სტუმრობისას, მსახიობმა თქვა:

“მე ბისექსუალი ვარ, ეს ასეა”.

ჰოლივუდის მსახიობი ყოველთვის იყო ლგბტქი უფლებების მტკიცე მხარდამჭერი. ჯერ კიდევ 2014 წელს, ოსკარის მფლობელმა სარანდონმა გეი ქორწინებისადმი მხარდაჭერა გამოხატა ადამიანის უფლებათა კაპანიის რეკლამაში – “ამერიკელები ქორწინების თანასწორობისთვის”.

“მიუხედავად იმისა, რომ ქორწინება ჩემი საქმე არაა, ვფიქრობ, ვისაც ეს სურს, ამის შესაძლებლობა უნდა ჰქონდეს, თანაბრად და განურჩევლად”, — ამბობს სიუზანი ვიდეოში.

2017 წელს, Pride Source-ისთვის მიცემულ ინტერვიუში კი, 75 წლის მსახიობმა განაცხადა, რომ მისი სექსუალობა “ღია” იყო.

“დიახ, მე ღია ვარ. ჩემი სექსუალური ორიენტაცია, შეიძლება ითქვას, ბოლომდე განსაზღვრული არ არის”, — განაცხადა მან.

სიუზან სარანდონმა პოპულარობა მას შემდეგ მოიპოვა, რაც მიუზიკლში Rocky Horror Picture Show ითამაშა. 1995 წელს მიიღო ოსკარი საუკეთესო მსახიობი ქალის როლის შესრულებისთვის ფილმში Dead Man Walking. მსახიობი ასევე ცნობილია პოლიტიკური და სოციალური აქტივიზმით, მათ შორის, სხვადასხვა პროგრესული, სოციალური და გარემოსდაცვითი მიზნების მხარდაჭერით.

ევროპრაიდის ისტორია მოკლედ — ლონდონიდან ბელგრადამდე

Published on სექტემბერი 12, 2022

ქვიარ ისტორია

2022 წლის 12-18 სექტემბერს სერბეთის დედაქალაქი ბელგრადი ევროპაში ყველაზე მასშტაბურ ლგბტქი ღონისძიებას, ევროპრაიდს მასპინძლობს. ეს პირველი შემთხვევაა, როცა სამხრეთ-აღმოსავლეთ ევროპის ქვეყანა, რომელიც არც ევროპის ეკონომიკური ზონის წევრია, აღნიშნულ ღონისძიებას მასპინძლობს.

აღნიშნულ გადაწყვეტილებას საპროტესტო აქცია და პრაიდის ჩაშლის მცდელობა მოჰყვა, თუმცა ევროპრაიდი მაინც დაიწყო.

30-წლიანი ისტორიის მქონე ღონისძიებამ დიდ ბრიტანეთში დაბადებული იდეიდან ევროპელი ლგბტქი ადამიანების საზეიმო, პოლიტიკურ, სოციალურად მნიშვნელოვან პროცესში გაერთიანების ხანგრძლივი, გამოწვევებით აღსავსე გზა გაიარა.

გასული საუკუნის 90-იანი წლები მნიშვნელოვანი ცვლილებების პერიოდი იყო. საბჭოთა კავშირი დაიშალა და ცივი ომი დასრულდა, მსოფლიო ახალ წესრიგზე გადაწყობის გზას გადიოდა, ლგბტქი უფლებების მიმართულებით კი მნიშვნელოვანი გამოწვევები ჯერ კიდევ გადასაჭრელი იყო. 80-იანი წლების აივ-შიდსის ეპიდემიის შოკმა, სხვადასხვა ქვეყნის ხელისუფლებების არასათანადო, არაეფექტურმა რეაგირებამ ლგბტქი ადამიანების მიმართ წარმოდგენები მკვეთრად გააუარესა, ამიტომ საჭირო იყო საპირწონე ნაბიჯები, რომლებიც სიტუაციას უკეთესობისკენ შეცვლიდა.

რა არის პრაიდი

პრაიდი ლგბტქი ღირსების, ხილვადობის, თანასწორობის მხარდამჭერი მსვლელობა ან ღონისძიებათა სერიაა, რომელიც მიზნად ისახავს ჩაგრული, მარგინალიზებული ადამიანების უფლებების დაცვის აუცილებლობისკენ ყურადღების მიმართვას, მათ მიერ საჯარო სივრცეზე არსებული უფლებით სარგებლობის გზით.

პირველი პრაიდ ღონისძიება 1970 წელს, სტოუნვოლის აჯანყების ერთი წლის თავზე გაიმართა და დღეისთვის, განვითარებული ქვეყნების უმრავლესობაში ყოველწლიური ხასიათი აქვს.

ევროპრაიდის იდეის დაბადება

90-იან წლებში, ევროპაში მძლავრი შემაკავშირებელი ბერკეტების შექმნაზე დაიწყეს ფიქრი, რომელიც ევროპის კონტინენტზე მცხოვრებ ხალხებს ერთმანეთთან დააკავშირებდა. სწორედ ამის გააზრებიდან დაიბადა ევროკავშირის ჩამოყალიბების იდეა. თუმცა ახალი კავშირის განვითარებაზე ფიქრმა გარკვეული რისკებიც მოიტანა, განსაკუთრებით ევროკავშირს მიღმა, მჩაგვრელი ხელისუფლების მქონე ქვეყანაში მცხოვრები ლგბტქი ადამიანებისთვის, რომლებიც შეცვლილ პოლიტიკურ ვითარებაში ევროპის ქვეყნებში შესვლას ბევრად რთულად შეძლებდნენ.

ლონდონის პრაიდის ორგანიზატორები — გეი და ლესბოსელი ადამიანების პრაიდის ორგანიზების კომიტეტი (LAGPOC) შეშფოთებული იყო დიდი ბრიტანეთის საზღვრებს მიღმა მცხოვრები ლგბტქი ადამიანების წინააღმდეგ არსებული დისკრიმინაციით, ამიტომ 1991 წლის მიწურულს გამართულ შეხვედრაზე გადაწყდა, რომ მომდევნო წლის პრაიდ ღონისძიებისთვის ევროპრაიდი ეწოდებინათ, რითაც დიდ ბრიტანეთში და მის მიღმა, მათ შორის, თანამეგობრობისა თუ ევროპის სხვა ქვეყნებში მცხოვრები ლგბტქი ადამიანების მხარდაჭერას შეძლებდნენ.

LAGPOC-ის ისტორიული შეხვედრის მომდევნო თვეებში, ორგანიზატორები აქტიურად ემზადებოდნენ ლონდონის პრაიდისთვის და პარალელურად უკავშირდებოდნენ, უგზავნიდნენ პოსტერებსა თუ პამფლეტებს ევროპის სხვა ქალაქებს, რომლებშიც პრაიდის ღონისძიებები იმართებოდა, მათ შორის, პარიზს, ბერლინსა და ამსტერდამს. იმ დროისთვის საერთაშორისო დონეზე კავშირის დამყარება, ღონისძიების ორგანიზების პროცესში მრავალი ქვეყნის ჩართვა ბევრად რთული იყო, თუმცა პრესრელიზები გაიგზავნა სხვადასხვა ქვეყნის ლგბტქი მედიასაშუალებებში და მალევე სტატიები გავრცელდა ნორვეგიაში, გერმანიაში, იტალიაში, აშშ-ში და სხვა ქვეყნებში.

საკამათოა, ვისი იდეა იყო ღონისძიების სახელი, ევროპრაიდი, თუმცა ბევრი აქტივისტის თქმით, აღნიშნული ტერმინი LAGPOC-ის წევრს, ვილი მილტონს ეკუთვნის, რომელიც შიდსით გამოწვეული გართულებებით საერთო ევროპულ მარშამდე 2 თვით ადრე გარდაიცვალა.

პირველ ევროპრაიდს 100 ათასზე მეტი ადამიანი შეუერთდა — ლგბტქი ადამიანებმა და მხარდამჭერებმა ლონდონის ცენტრალური ქუჩები დაიკავეს, რასაც ბროკველის პარკში გამართული კონცერტი მოჰყვა. ლონდონის “გეი სცენის” ბარებმა პარკში საკუთარი სტენდები გახსნეს, ღონისძიებას აივ და სექსუალური ჯანმრთელობის ორგანიზაციები ესწრებოდნენ და ცნობიერების ამაღლებაზე ზრუნავდნენ, ადგილზე წარმოდგენილნი იყვნენ ქვიარ ბიზნესები, სხვადასხვა ეთნიკური წარმომავლობისა და რასის ადამიანებს საინფორმაციო კარვები ჰქონდათ გახსნილი, რაც იმ დროისთვის წინგადადგმულ ნაბიჯად ითვლებოდა.

პირველ ევროპრაიდს დაესწრნენ ადამიანები გერმანიიდან, საფრანგეთიდან, ნიდერლანდებიდან და ესპანეთიდან. ღონისძიების დღეების შესახებ გადაღებულ ვიდეოში პოლიტიკური თემების ღიად განხილვას ნახავთ — ნორვეგიელმა ვიზიტორებმა ლგბტქი თანასწორობის კუთხით არასათანადო ქმედებებისთვის ღიად გააკრიტიკეს დიდი ბრიტანეთის პრემიერმინისტრი ჯონ მეიჯორი, თუმცა თითქმის მთელი ათწლეული გავიდა, სანამ ბრიტანეთის ხელისუფლება მნიშვნელოვან ცვლილებებზე ფიქრს დაიწყებდა.

1992 წლის ევროპრაიდის შემდგომ სპეციალური ჟურნალის ნომერიც გამოიცა, რომელშიც ევროპაში ლგბტქი უფლებების კუთხით არსებულ მდგომარეობაზე დისკურსს ნახავდით. კაცებს შორის ჰომოსექსუალური კავშირი ჯერ კიდევ არალეგალური იყო კვიპროსში, ესტონეთში, ირლანდიაში, ლატვიაში, ლიეტუვაში და ყოფილ საბჭოთა კავშირის ქვეყნებში, რუმინეთი კი ქალებს შორის სქესობრივ კავშირსაც კრძალავდა.

ლონდონიდან ბერლინამდე და ამსტერდამამდე

მაშინ, როცა LAGPOC პირველი ევროპრაიდისთვის ემზადებოდა, ევროპის სხვადასხვა ქვეყნის პრაიდ მოძრაობების წარმომადგენლები გეი და ლესბოსელი ადამიანების ასოციაციის (ILGA World) ყოველწლიურ კონფერენციაზე შეხვდნენ. ILGA ევროპრაიდით დაინტერესდა და მხარდაჭერა გამოუცხადა როგორც ზოგადად პრაიდი ჩატარებას, ასევე, ლონდონის შემდეგ, ამ ღონისძიების 1993 წელს ბერლინში გამართვას.

გერმანიაში პრაიდის ტიპის ღონისძიებები კრისტოფერ სთრითის დღედ (CSD) მოიხსენიება, რაც იმ სახელია, რომელზეც ბარი სტოუნვოლი მდებარეობს. CSD-ის ორგანიზატორები 1992 წლის ევროპრაიდს დაესწრნენ და მომდევნო ღონისძიების ბერლინში ჩატარების გამოწვევასაც სიხარულით შეხვდნენ. მართალია, ბერლინში გამართულ ევროპრაიდს უფრო ნაკლები, 30 ათასი ადამიანი დაესწრო, მაგრამ ეს წინა წლის ბერლინის პრაიდის მასშტაბს მაინც სამჯერ აღემატებოდა.

ევროპრაიდის მომდევნო მასპინძელი ამსტერდამ პრაიდი იყო, თუმცა იმავე პერიოდში დაიწყო მსჯელობა იმაზე, რომ ევროპრაიდი მხოლოდ იმ ქალაქებში არ უნდა ჩატარებულიყო, სადაც ლგბტქი უფლებების თვალსაზრისით ნაკლებად მწვავე ვითარება იყო. 1994 წელს, ILGA-ს კონფერენციაზე ევროპრაიდის ორგანიზატორების ასოციაცია (EPOA) ჩამოყალიბდა. ასევე, დამსწრეები შეთანხმდნენ, რომ ღონისძიება ადამიანის უფლებათა დაცვის უფრო მძლავრ ბერკეტად უნდა ექციათ და ამასთან, ადამიანები საზეიმო ვითარებაში შეეკრიბათ.

ევროპრაიდი დიდ ფინანსურ რესურსს მოითხოვდა, ამიტომ პირველი სამი მასპინძელი ქვეყნის პრაიდ ორგანიზაციებმა არსებობის გაგრძელება ვერ შეძლეს, თუმცა მალევე ახალი ორგანიზაციები დაფუძნდა. ევროპრაიდი კი ერთწლიანი პაუზის შემდეგ, 1996 წელს კოპენჰაგენში, 1997 წელს პარიზში, ხოლო 1998 წელს სტოკჰოლმში გაიმართა.

ევროპრაიდი 21-ე საუკუნეში

EPOA-ს ხელმძღვანელობით ევროპრაიდი სულ უფრო იზრდებოდა და დასავლეთ ევროპის სხვადასხვა ქვეყნის პრაიდ ორგანიზაციებს იკრებდა. რომის პრაიდ ორგანიზაციამ კონფერენციაზე იდეა გააჟღერა, რომ ევროპრაიდი გლობალურ ფენომენად ექციათ და მსოფლიო პრაიდი დაეფუძნებინათ. EPOA-მ იდეა მოიწონა და ნიუ-იორკში გამართულ საერთაშორისო პრაიდ ქსელის კონფერენციაზე წარადგინა. 2000 წელს რომმა პირველ მსოფლიო პრაიდს უმასპინძლა.

მსოფლიო პრაიდის პარალელურად, ევროპრაიდმა არსებობა განაგრძო და ჩატარდა ვენაში, კიოლნში, მანჩესტერში, ჰამბურგში, ოსლოში, მადრიდში ციურიხში, განმეორებით გაიმართა ლონდონსა და სტოკჰოლმში. ცვლილება მოხდა 2005 წელს, როცა თანასწორობის მარშის ორგანიზატორებს პოლონეთმა, კერძოდ კი ვარშავის მერმა მსვლელობის მოწყობაზე უარი უთხრა.

მარშის ორგანიზატორმა, ტომაშ ბაჩკოვსკიმ პოლონეთს ადამიანის უფლებათა ევროპულ სასამართლოში უჩივლა. აკრძალვიდან 2 წელში სასამართლომ გადაწყვეტილება გამოაცხადა, რომლის თანახმადაც, აკრძალვა ადამიანის უფლებებთან წინააღმდეგობაში მოდიოდა. ეს იყო პირველი პრეცედენტი, როცა სასამართლომ დაადგინა, რომ პრაიდში მონაწილეობა ფუნდამენტური უფლებაა. აღნიშნულ გადაწყვეტილებას EPOA დღემდე მიმართავს, როცა რომელიმე ხელისუფლება ღონისძიების აკრძალვას ცდილობს.

2010 წელს, ევროპრაიდი პირველად ჩატარდა ყოფილ კომუნისტურ ქვეყანაში, პოლონეთში. 2015 წელს კი ლატვია გახდა პირველი პოსტსაბჭოთა ქვეყანა, რომელმაც ევროპრაიდს უმასპინძლა. რიგაში და ვარშავაში ჩატარებულმა ევროპრაიდებმა ეროვნულ მარშებზე ბევრად მეტი ვიზიტორი მოიზიდა, რამაც ვარშავის პრაიდისა და რიგის პრაიდის ყოველწლიური დამსწრეების რიცხვზე პოზიტიურად იმოქმედა.

მომდევნო წლებში ევროპრაიდი ბევრად უსაფრთხო ქალაქებში — მარსელში, ისევ ოსლოში, ლონდონში, ამსტერდამსა და ვენაში ჩატარდა, თუმცა ეს სულაც არ ნიშნავს, რომ შედარებით დაცულ გარემოში ღონისძიების ჩატარება მძლავრი გზავნილების, ეფექტური კამპანიის დაგეგმვის შესაძლებლობას ამცირებს. ევროპრაიდი მუდამ ცდილობდა, მიეზიდა მაქსიმალურად მრავალფეროვანი აუდიტორია, აქტივისტები, სამოქალაქო საზოგადოების ლიდერები, პოლიტიკოსები, მსოფლიო მნიშვნელობის ფიგურები და აქტივიზმისა და საზეიმო მსვლელობის ერთგვარი ნაზავი მოეწყო.

2019 წელს, ბილბაოში გამართულ კონფერენციაზე 2022 წლის ევროპრაიდის მასპინძლობის სურვილი ოთხმა ქალაქმა: ბარსელონამ, ბელგრადმა, დუბლინმა, ლისაბონმა და პორტომ კი ერთობლივად გამოთქვეს. ოთხივე კანდიდატმა საკუთარი არგუმენტები, გეგმა და კულტურულ ღონისძიებათა იდეები წარადგინა, რომლითაც ადამიანის უფლებათა დაცვის კამპანიების ჩატარებას, ხელშეწყობას გეგმავდნენ.

საბოლოოდ, ბელგრად პრაიდის კანდიდატურამ აშკარა უპირატესობით გაიმარჯვა და EPOA-ს წევრების 70%-ის მხარდაჭერა მოიპოვა. ეს სიტუაცია გასაკვირი არაა, თუ ბელგრად პრაიდის ისტორიას გავითვალისწინებთ — დაახლოებით 20 წლის წინ, თანმდევი პროტესტის მიუხედავად ჩატარებულ ღონისძიებებს ბოლო წლებში ბევრად მშვიდობიანი აქტივობები ჩაენაცვლა. მიუხედავად ამ მნიშვნელოვანი ძვრებისა, ლგბტქი უფლებები სერბეთში ჯერაც არ არის სახარბიელო — ევროპის ადამიანის უფლებათა რუკაზე სერბეთს ევროპის ქვეყნების ნახევარზე მეტი უსწრებს და სამხრეთაღმოსავლეთ ევროპის სახელმწიფოს ჯერაც გრძელი გზა აქვს გასავლელი.

2022 წლის ევროპრაიდი ღონისძიების მიერ განვლილი გზის ერთგვარი სიმბოლური გამოხატულებაა — 1992 წელს, იუგოსლავიის დაშლისა და სერბეთის რესპუბლიკის ჩამოყალიბების პერიოდში, ლონდონში დაწყებული მოძრაობა დღეს უკვე ახალ, თანასწორობის გზაზე მდგომ ქვეყანაში იმართება.

ევროპრაიდმა ხანგრძლივი გზა გაიარა და პარალელურად იცვლებოდა ევროპაში ლგბტქი ადამიანების უფლებრივი მდგომარეობა. წინ კიდევ გრძელი გზაა, რომელმაც საბოლოოდ თანასწორობის მაქსიმალურ დაცვამდე უნდა მიგვიყვანოს, ეს კი ერთიანი ძალებით უფრო მარტივად წარმოსადგენია.

წყარო: European Pride

ბოლო 8 წელში საქართველოში 186 ქალი მოკლეს

Published on სექტემბერი 10, 2022

ქვიარ სიახლეები

საქართველოს პროკურატურის ინფორმაციით, 2014-2022 წლებში საქართველოში 186 ქალი მოკლეს. უწყება ამბობს, რომ “ოჯახური ნიშნით” ჩადენილია 92 ქალის მკვლელობა, ხოლო “სხვა მოტივით” – 94 ქალის მკვლელობა.

უწყება ფემიციდის შესახებ სტატისტიკას აქვეყნებს, რომლის მიხედვით:

2014 წელს საქართველოში მოკლეს 33 ქალი
2015 წელს საქართველოში მოკლეს 17 ქალი
2016 წელს საქართველოში მოკლეს 28 ქალი
2017 წელს საქართველოში მოკლეს 22 ქალი
2018 წელს საქართველოში მოკლეს 18 ქალი
2019 წელს საქართველოში მოკლეს 15 ქალი
2020 წელს საქართველოში მოკლეს 22 ქალი
2021 წელს საქართველოში მოკლეს 18 ქალი
2022 (8 თვის მონაცემები) წელს საქართველოში მოკლეს 13 ქალი

პროკურატურის ინფორმაციით, ამ 8 წლის განმავლობაში იყო ქალის მკვლელობის 129 მცდელობა.

უწყებაში აცხადებენ, რომ ოჯახურ დანაშაულებზე მკაცრ სისხლის სამართლის პოლიტიკას ატარებენ და ამას ადასტურებს 2014 წლიდან სისხლისსამართლებრივი დევნის მაჩვენებლის ყოველწლიური ზრდა. მათი ინფორმაციით, 2014 წელს სისხლისსამართლებრივი დევნა 550 პირის მიმართ დაიწყო, 2021 წელს — 5144 პირის მიმართ, ხოლო 2022 წლის 8 თვის მონაცემებით, სისხლისსამართლებრივი დევნა დაწყებულია 4591 პირის მიმართ.

პროკურატურის განცხადებითვე, მზარდია პროკურორების მიერ ოჯახური დანაშაულის ჩამდენ პირთა მიმართ აღკვეთის ღონისძიების სახით პატიმრობის მოთხოვნის პროცენტული მაჩვენებელი. მათი ინფორმაციით, 2022 წლის 8 თვეში ოჯახურ დანაშაულზე პატიმრობის მოთხოვნის პროცენტულმა მაჩვენებელმა 88% შეადგინა

უწყების მტკიცებით, პროკურატურის ადამიანის უფლებათა დაცვის დეპარტამენტი ყოველდღიურ რეჟიმში ახორციელებს ქალთა მიმართ გენდერული ნიშნით ჩადენილი მკვლელობების, მკვლელობების მცდელობისა და თვითმკვლელობამდე მიყვანის სისხლის სამართლის საქმეების მონიტორინგს.

“2014 წლიდან, საქართველოს პროკურატურა აწარმოებს საერთაშორისო სტანდარტებზე დაფუძნებულ სტატისტიკას და ქალთა მკვლელობების (ფემიციდის) სისხლის სამართლის საქმეების ანალიზს. ფემიციდის მონიტორინგის ფარგლებში, აღნიშნული სტატისტიკური მონაცემებით ხელმძღვანელობს საქართველოს სახალხო დამცველი, ასევე არასამთავრობო და საერთაშორისო ორგანიზაციები. საქართველოს პროკურატურა მუშაობს სისხლის სამართლის საქმეებში გენდერული დისკრიმინაციის მოტივის გამოკვეთაზე და ადამიანის უფლებათა ევროპული სასამართლოს გადაწყვეტილებების პრაქტიკაში დანერგვაზე”, — აცხადებენ პროკურატურაში.

მათივე ინფორმაციით, 2016-2022 წლებში, გენდერული დისკრიმინაციის მოტივი გამოიკვეთა 1624 ბრალდებულის მიმართ. ხოლო ფემიციდის საქმეებში გენდერული დისკრიმინაციის მოტივი პირველად გამოიკვეთა 2018 წელს და დღემდე ქალთა მკვლელობის საქმეებში გენდერული დისკრიმინაცია იდენტიფიცირებულია 45 ბრალდებულის მიმართ.

“კანონმდებლობის დახვეწის მიზნით, საქართველოს პროკურატურამ შეიმუშავა საკანონმდებლო ცვლილებათა პაკეტი, რომლის მიზანია ოჯახური დანაშაულის ჩამდენი ბრალდებულების მიმართ ელექტრონული ზედამხედველობის გამოყენება. ცვლილების თანახმად, დაინერგება ელექტრონული ზედამხედველობა, რომლის ფარგლებშიც ოჯახური დანაშაულის ჩადენაში ბრალდებული პირების ქცევაზე 24-საათიანი ელექტრონული მონიტორინგი განხორციელდება. ელექტრონული სამაჯურების გამოყენება დაზარალებულთა დაცვის მნიშვნელოვანი გარანტია იქნება ბრალდებულთა მიმართ არასაპატიმრო აღკვეთის ღონისძიების გამოყენების შემთხვევაში. კერძოდ, ელექტრონული ზედამხედველობის დანერგვა შექმნის ბრალდებულის დაზარალებულთან მიახლოების აკრძალვის კონტროლის ეფექტიან მექანიზმს და ბრალდებულის მხრიდან ძალადობის განმეორების რისკებს შეამცირებს”, — აღნიშნავენ უწყებაში.

მათივე განცხადებით, საქართველოს პროკურატურა აგრძელებს “მკაცრ სისხლის სამართლის პოლიტიკას ქალთა მიმართ ძალადობის ყველა ფაქტზე და ძალადობის ჩამდენი ყველა პირი კანონის ფარგლებში უმკაცრესად დაისჯება”.

უწყება საუბრობს საზოგადოების ჩართულობის მნიშვნელობაზეც და აღნიშნავს, რომ ცნობიერების ამაღლებისა და დანაშაულის პრევენციის მიზნით, 2022 წლის სექტემბერში, პროკურატურა იწყებს მასშტაბურ კამპანიას ფემიციდის წინააღმდეგ.

“აღნიშნულ პროცესში, გამოვხატავთ მზაობას ვითანამშრომლოთ სახელმწიფო თუ არასამთავრობო ორგანიზაციებთან, საზოგადოების წარმომადგენლებთან, ვისაც შეუძლია წვლილი შეიტანოს სამართლებრივი ცნობიერების ამაღლების პროცესში”, — ამბობენ პროკურატურაში.

ფემიციდი არის ქალების და გოგოების მკვლელობა გენდერის ნიშნით. უფლებადამცველები უკვე წლებია ითხოვენ საქართველოს კანონმდებლობაში ფემიციდის დეფინიციის ჩაწერას.

6-9 ოქტომბერს WISG-ის ფემინისტური ფორუმი გაიმართება

Published on სექტემბერი 10, 2022

ქვიარ სიახლეები

2022 წლის 6-9 ოქტომბერს, ქალთა ინიციატივების მხარდამჭერი ჯგუფის (WISG) ორგანიზებით, თბილისში ფემინისტური ფორუმი გაიმართება.

ფემინისტური ფორუმი უსაფრთხო სივრცისა და ინტერდისციპლინური ქსელის შექმნის ინიციატივაა, რომელიც სოციალურ თეორიასა და პრაქტიკაზე ფემინისტური რეფლექსიის მიზნით მკვლევრებს, აქტივისტებს, სტუდენტებს, სათემო და სახელოვნებო ორგანიზაციებისა და ფორმალური და არაფორმალური კოლექტივების წევრებს ერთმანეთთან დააკავშირებს.

“ფემინისტური ფორუმის მიზანს ცოდნის, გამოცდილებისა და იდეების გაზიარების, კრიტიკული ანალიზისა და მსჯელობისთვის უსაფრთხო სივრცის შექმნის გზით, ინტერსექციური და სოლიდარობაზე დაფუძნებული თანამშრომლობის ხელშეწყობა წარმოადგენს“, — ვკითხულობთ WISG-ის ღონისძიების აღწერაში.

ღონისძიების აღწერაში ასევე ნათქვამია, რომ წლევანდელი ფორუმი განსაკუთრებით საყურადღებოა “ფემინისტი და ქვიარ აქტივისტებისა და მათთვის, ვისაც აინტერესებს კულტურის კვლევების, ფსიქოლოგიის, ურბანისტიკის, ეკოლოგიის და ორგანიზაციული განვითარების მიმართულებით სოციალური კვლევის გენდერული ასპექტები”.

თუ ფემინისტურ ფორუმში მონაწილეობა გსურთ, 30 სექტემბრამდე სარეგისტრაციო ფორმა უნდა შეავსოთ. გაითვალისწინეთ, რომ შერჩევისას უპირატესობა მიენიჭებათ იმ ადამიანებს, რომლებიც ფორუმზე სრულად დასწრებას გეგმავენ.

ღონისძიება ქალთა ფონდთან თანამშრომლობით და ჰაინრიხ ბიოლის ფონდის თბილისის ოფისის მხარდაჭერით ტარდება. ფორუმის შესახებ დეტალური ინფორმაციისა და დღის წესრიგის სრულად ნახვა WISG-ის ვებგვერდზე შეგიძლიათ.

სექტემბერი 2022 - Page 5

“გეი სისხლი” — სისხლის დონაციაზე არსებული შეზღუდვების გასაპროტესტებლად

მსოფლიოში 50 მილიონი ადამიანი თანამედროვე მონობაში ცხოვრობს – ანგარიში

ტრანსფობია გერმანიაში — ანტი-ქვიარ თავდასხმების გაზრდილი მაჩვენებელი

არასრული მონაცემები

პოლიტიკურად მოტივირებული ძალადობა

პოლიტიკოსების რეაქცია

სერბეთის პოლიციამ ევროპრაიდის მარში აკრძალა — ორგანიზატორები გაასაჩივრებენ

მსახიობი სამირა უილი და მისი შემთხვევითი ქამინგაუთი

აღმოსავლეთ ევროპა და ცენტრალური აზია აივ-ინფიცირების ყველაზე სწრაფად მზარდი რეგიონებია

მსახიობი სიუზან სარანდონი ბისექსუალად დაქამინგაუთდა

ევროპრაიდის ისტორია მოკლედ — ლონდონიდან ბელგრადამდე

რა არის პრაიდი

ევროპრაიდის იდეის დაბადება

ლონდონიდან ბერლინამდე და ამსტერდამამდე

ევროპრაიდი 21-ე საუკუნეში

ბოლო 8 წელში საქართველოში 186 ქალი მოკლეს

6-9 ოქტომბერს WISG-ის ფემინისტური ფორუმი გაიმართება

ქვიარების მედეგობა და სიძლიერე

იოგას თერაპიული პრაქტიკა ქვიარების მხარდასაჭერად

სად არის შენი ადგილი?

“შესაძლოა, მთელი ანტიკური ლიტერატურა ასაკრძალ სიაში მოხვდეს” – ინტერვიუ ნანა აბულაძესთან

სექტემბერი 2022 - Page 5

Don't Miss

Don't Miss

არასრული მონაცემები

პოლიტიკურად მოტივირებული ძალადობა

პოლიტიკოსების რეაქცია

Don't Miss

Don't Miss

Don't Miss

Don't Miss

Don't Miss

რა არის პრაიდი

ევროპრაიდის იდეის დაბადება

ლონდონიდან ბერლინამდე და ამსტერდამამდე

ევროპრაიდი 21-ე საუკუნეში

Don't Miss

Don't Miss

Don't Miss