”სნიკერსის” ბევრისთვის ცნობილი სარეკლამო სერია ”შენ შენ არ ხარ, როცა გშია”, იუმორით გამოირჩევა, თუმცა ესპანურ ტელევიზიაში გასული ”სნიკერსის” ერთ-ერთი სარეკლამო რგოლი იუმორისგან შორს აღმოჩნდა, სამაგიეროდ ექსცენტრიულობა და ჰომოფობია შეითავსა.
სარეკლამო რგოლში ესპანელი ინფლუენსერი ალეს გიბახა ზღვის სანაპიროზე, კაფეში, მეგობართან ერთად ისვენებს, სადაც ”სექსუალურ ფორთოხლის წვენს A, B, C ვიტამინით” უკვეთავს. გიბახა, რომელსაც გრძელი თმა აქვს, ფერადი სათვალეები უკეთია და საუბრისას ექსპრესიულია, მეგობრის შეთავაზებით, შეკვეთის მოსვლამდე ”სნიკერსის” ნაყინს ჭამს. ”უკეთესია?” – ეკითხება მეგობარი, რის შემდეგაც კამერა გიბახას უბრუნდება, მაყურებელი კი მას უკვე შეცვლილი გარეგნობით ხედავს. გარდასახული ალეს გიბახა სტერეოტიპული და მასკულინურია – წვერით, მოკლე თმითა და ბოხი ხმით. ”კი, უკეთესია” – პასუხობს მეგობარს.
”სნიკერსის” ჰომოფობიურ რეკლამას არაერთგვაროვანი რეაქცია მოჰყვა. ესპანეთის ქვიარ თემმა მას ”სამარცხვინო” და ”დასანანი” უწოდა და ”სნიკერსის” მწარმოებელ კომპანიას შემდეგი სარეკლამო რგოლების მოსამზადებლად უფასო ტრენინგი შესთავაზა.
”სნიკერსმა” ბოდიში მოიხადა და სარეკლამო რგოლი სატელევიზიო ბადიდან ამოიღო.
„სნიკერს, შენ შენ არ ხარ როცა შეურაცხმყოფელად იქცევი“.
წყარო: them.us
Don't Miss
