გაერთიანებულ სამეფოში ლგბტქი გარდაქმნის თერაპიის დასრულების მრავალწლიანი დაპირების შემდეგ, პრემიერმინისტრმა ბორის ჯონსონმა წინა კვირაში გამოაცხადა, რომ თერაპია აიკრძალებოდა, მაგრამ არა ტრანსგენდერი ადამიანებისთვის.
ხუთშაბათს, გაერთიანებული სამეფოს დამოუკიდებელმა საინფორმაციო მაუწყებელმა ITV-მ მოიპოვა ჯონსონის ოფისიდან გავრცელებული დოკუმენტი, რომელშიც ნათქვამია, რომ მისმა მთავრობამ არ უნდა გააგრძელოს კანონმდებლობის შეცვლა ლგბტქი გარდაქმნის თერაპიის აკრძალვის შესახებ. მაგრამ მას შემდეგ, რაც ბორის ჯონსონის კონსერვატიული პარტიის მაღალი რანგის რამდენიმე წარმომადგენელმა პირობა დადო, რომ აკრძალვას მხარს დაუჭერდა, ჯონსონმა გამოაცხადა, რომ კვლავ ითხოვს გარდაქმნის თერაპიის აკრძალვას გეი, ლესბოსელი და ბისექსუალი ადამიანებისთვის, მაგრამ ეს კანონი არ გავრცელდება ტრანსგენდერ ადამიანებზე.
ლგბტქი საზოგადოების დამცველებმა და გარდაქმნის თერაპიის მსხვერპლებმა ეს ცვლილება დაგმეს.
„როგორც ადამიანი, რომელმაც თითქმის 20-წლიანი გარდაქმნის თერაპიის პრაქტიკა გაიარა, რის გამოც ორჯერ ვიყავი საავადმყოფოში, ეს სრულიად მიუტევებლად მიმაჩნია. ეს ქმნის მტრულ გარემოს ლგბტქი ადამიანებისთვის, განსაკუთრებით, ტრანსგენდერი ადამიანებისთვის“
– განაცხადა ერთ-ერთმა თერაპიის მსხვერპლმა Guardian-ის ინტერვიუში.
შეგახსენებთ, რომ 2020 წელს, გაეროს ადამიანის უფლებათა საბჭომ გარდაქმნის თერაპია აღიარა, როგორც წამება და მსოფლიოს ქვეყნებს მისი აკრძალვისათვის გადაუდებელი ზომების მიღებისაკენ მოუწოდა.
